Әйткән сүз – аткан ук

Салават ФӘТХЕТДИНОВ, җырчы:

– Замана үзгәрде. Безнең әбиләргә дә хәзер татар моңы кирәкми. Аларга Элвин Грей (Радик Юльякшинның сәхнәдәге исеме – ред. иск.) кирәк. Мин шаккатам моңа. Бу замана агышы, мәгънәсезлек, әллә татардан качу микән, аңламыйм.

«Азатлык»

Минтимер ШӘЙМИЕВ, Татарстанның Дәүләт Киңәшчесе, «Яңарыш» республика фондының Попечительләр советы рәисе:

– Сентябрь аенда Болгар ислам академиясендә уку елын уңышлы башлап җибәрү өчен барысын да эшләү – киләсе елда төп бурыч.

«Бизнес-Онлайн»

Марина ПАТЯШИНА, Кулланучылар хокукын яклау һәм кеше иминлеге өлкәсендә күзәтчелек федераль хезмәтенең Татарстан буенча идарәсе башлыгы:

– Составында пальма мае булган сөт ризыкларыннан котылдык дияргә иртәрәк. Сыйфатсыз продукция, нигездә, федераль сәүдә челтәрләрендә табыла. Республика челтәрләрендә мондый очраклар сирәк.

«Татар-информ»