Әйткән сүз − аткан ук

Мәдинә МАЛИКОВА, язучы:

– Габдулла Тукай исемендәге Дәүләт премиясенең исеме, әлбәттә, зур, ә менә премиясе (үзем алырга җыенганнан түгел) чамалы гына. Республиканың мөмкинлекләре шулайдыр, дип уйлыйм. Талантлы иҗат итүчеләрнең барысына да бирәсе килә…

«Интертат»

Иван КУЗНЕЦОВ, Казан шәһәре башкарма комитеты җитәкчесе урынбасары:

– Татар кызына гашыйк булсагыз, бу хис сезгә телне үзләштерүдә төп этәргеч булыр. Көнегезне, минем шикелле, эшкә кадәр иртәнге сәгать җиде-сигездә татар телен өйрәнүдән башларсыз.

«Шәһри Казан»

Тәэминә БИКТИМЕРОВА, тарихчы, тарих фәннәре кандидаты:

– 8нче мартны без Халыкара хатын-кызлар көне, хатын-кызларга хокуклар бирелгән көн дип шаулап-гөрләп бәйрәм итә идек. Хәзер ярый акылыбызга килдек: бу – хатын-кызларга хөрмәт күрсәтә торган яз бәйрәме.

«Реальное время»