Казан керәшен чибәрләрен эзли

Ел саен Мамадыш районы Җөри авылында республика күләмендә Питрау бәйрәме оештырыла. Бәйрәмнең иң мавыктыргыч өлеше – “Керәшен чибәре” бәйгесе. Конкурска бөтен Татарстаннан иң булган кызлар җыела. Быел бу бәйгедә Казан шәһәре дә катнашырга җыена, инде әзерлек чараларын башлаганнар да: 13 апрельдә Казанның халыклар дуслыгы йортында “Керәшен чибәре” конкурсы оештырыла.

Бәйгедә 15 яшьтән алып, 25 яшькә кадәрле кызлар катнаша ала. Анда кызлар үзләре белән таныштырырга, этник концерт номеры күрсәтергә, керәшен костюмын тәкъдим итәргә һәм керәшеннәр турындагы сорауларга җавап бирергә әзер булырга тиеш.

Конкурста җиңүче кызларга бүләкләр биреләчәк. Ә төп җиңүче Мамадыш районы Җөри авылында узачак “Керәшен чибәре”ндә Казан данын яклаячак.